Mae’n bleser gan Dolen Cymru, ar y cyd â’r CPA, gynnal derbyniad siampên ac arwerthiant elusennol er budd Apêl 25 Dolen Cymru, ar 12 Tachwedd. Ei Fawrhydi, Brenin Letsie III fydd y gwestai anrhydeddus yn y digwyddiad arbennig, sy’n codi arian tuag at Apêl 25 Dolen Cymru.

Nod Apêl 25 yw codi £250,000 ar gyfer adeiladu canolfan hyfforddi gynaliadwy yn Lesotho a fydd yn cynnig cefnogaeth fawr ei hangen i ddatblygu sgiliau’r bobl fwyaf agored i niwed yn Lesotho. Mae bron traean poblogaeth Lesotho yn dioddef o HIV/AIDS, ac mae’r disgwyliad oes yn Lesotho yn llai na 40 mlynedd. O ystyried ystadegau mor enbyd, mae gwaith addysgol a hyfforddiant yn hanfodol ar gyfer adeiladu dyfodol gwell i Lesotho.

Mae’n anrhydedd i ni gael nifer o westeion arbennig yn mynychu’r digwyddiad gan gynnwys pobl bwysig ym mywyd Lesotho, y Prif Weinidog y Gwir Anrhydeddus Rhodri Morgan, aelodau o Gynulliad Cymru ac ymddiriedolwyr a gwirfoddolwyr Dolen Cymru.

Rydym wedi sicrhau nifer o roddion cyffrous ar gyfer yr arwerthiant gan gynnwys treulio diwrnod gyda’r RAF, gwers goginio gydag Aled Williams, sef enillydd ysgoloriaeth 2006 Gordon Ramsay, penwythnos yn y gwesty newydd, The Townhouse ym Miwmares a llawer o roddion eraill.

Gobaith cyfarwyddwr interim Dolen Cymru, Eleanor Gardner, yw y bydd Apêl 25 yn cynnig cyfle i bobl Lesotho weithio tuag at greu dyfodol cynaliadwy.

Meddai Eleanor ‘Mae’r ganolfan hyfforddi’n hanfodol er mwyn i Lesotho ddatblygu a chryfhau ymhellach ei chysylltiadau hanfodol â Chymru. Bydd yn creu amgylchedd delfrydol i Dolen Cymru weithio ochr yn ochr â Lesotho Wales Link, ein chwaer elusen yn Lesotho. Bydd hyn yn ein galluogi ni i gychwyn strwythur cefnogi angenrheidiol ar gyfer cysylltiadau hanfodol rhwng Cymru a Lesotho a chynyddu ein gwaith da rhwng y ddwy genedl. Mae Dolen Cymru yn gweithio tuag at gynnig rhagolwg i bobl agored i niwed Lesotho o ddyfodol gwell a mwy cynaliadwy.’

Nodiadau i Olygyddion

Dolen Cymru

Mae Dolen Cymru - Wales Lesotho Link - yn elusen o Gymru a sefydlwyd yn y Swyddfa Gymreig ym 1985 a hon fu’r enghraifft gyntaf o efeillio gwlad a gwlad yn y byd. Mae Dolen Cymru yn hyrwyddo gweithgareddau sy’n cysylltu mudiadau iechyd, ysgolion, pentrefi, ardaloedd, ac eglwysi yng Nghymru ac yn Lesotho.

Apêl 25

Nod Apêl 25 yw codi £250,000 erbyn 2010, sef pen-blwydd Dolen Cymru yn 25 oed, i adeiladu, cyfarparu a chefnogi canolfan hyfforddi a diwylliannol fodern yn Lesotho. Helpwch Dolen Cymru i gyrraedd ein nod o sicrhau’r cyfleuster hyfforddi hwn, a fydd yn cynnig cefnogaeth fawr ei hangen tuag at ddatblygu sgiliau i bobl Lesotho, gan adeiladu ar eu gallu a’u helpu nhw i helpu eu hunain.

Bydd rhaglenni hyfforddi’n cynnwys sgiliau cyfrifiadurol, cyrsiau rheoli, sgiliau byw’n annibynnol a sgiliau garddwriaethol. Bydd ein cyfleusterau o fewn cyrraedd y bobl fwyaf agored i niwed yn Lesotho. Yn benodol, bydd sesiynau hyfforddi’n cael eu teilwra i ateb anghenion pobl anabl, gan ganiatáu iddynt ennill sgiliau gwerthfawr a’u galluogi nhw i sicrhau cyfleoedd gwaith.